Manchmol machter viel Verdruss
der guate alte Reißverschluss,
duascht ihn aber recht schtudiera
wird’s zu dem Ergebnis führa,
ziagsch ihn rauf ond wieder ronter
grenzt des beinoh an a Wonder,
Zah om Zah en Zwoierreih
greifed enanander nei,
müassed manches zammahalta
oder irgendwas entfalta.
Verwendet wird er, ond des lobe,
vor allem bei dr Garderobe,
was sonscht a Knopf so halta muaß
macht heutzutag dr Reißverschluss.
Bei manche Sacha, wos halt goht,
ersetzt mer domit au a Noht
ond mancher wünscht es wär scho Brauch
mer hätt en Reißverschluss am Bauch
do bräucht bei viele schwere Leida
dr Arzt net jedesmol glei schneida,
des gibts no net, doch kahschs verleba,
’s könnt’s eventuell scho recht bald geba.
A Reißverschluss wird au mol heh
ond des ka peinlich sei, oh jeh,
wenn oiner en de Jeans romsitzt
ond ihm dr Reißverschluss do schlitzt
was soll der arme Kerle macha?
En soama Fall vergoht oim ’s Lacha,
ond ’s denket manche helle Köpf
hätt ich am Hosalada Knöpf,
wenn von fenf Schtück bloß oiner knallt
gebet dia andre grad gnuag Halt.
Doch Panna kahs bei vielem geba,
so ischt des halt amol em Leba.
Reißverschlüss en alle Länga
sieht mer en de Läda hänga,
entscheida muascht von Fall zu Fall,
brauchsch se aus Plaschtik, aus Metall,
ond farblich gibt´s so vielerlei
do ischt dr richtig gwiß drbei.
I brauch au oin, ben au betroffa,
mei Hosafall schtoht wieder offa,
du siehschs, hosch manchmol doch Verdruss
mit dem guata, alta Reißverschluss.
