D'r Michel hot sein Waga sechs Wocha nemme g'schmiert,
jetzt grillet älle Räder, des hot en arg scheniert.
Er hot amol en Hafa voll Wagaschmiere kauft,
do schmiert er jetzt sein Waga, dass Briah dra nonderlauft.
"Wart, dir dua i fiers Grilla, do wirt et lang fladiert-
mit Schmiera und mit Salba hot m'r schau viel kuriert.
De andre Tag wird ei'schpannt: Hüh Blessle, woidle Scheck!"
Dia Viehcher brenget schier gar da Waga et vom Fleck.
Von äll vier Wagaräder dreht sich koi oizigs rom-
D'r Bauer und sei Viehcher, dia gucket bloß so domm.
Do kommt au d'Bäure g'loffa und guckt da Schada a,
beim Bucka kommt ihr Schdompfnas ganz noch ans Rädle na.
Des Weib schprengt uf wia Odder und rasslet nei ins Haus,
glei kommt se mit ema Hafa zu ihrem Alta raus.
"Du bischt a reachter Walle, a ********* obadrei,
so, de'scht dei Wagaschmiere? Schteck no dein Zenka nei!
Derfscht au a Maul voll nemma, no merkscht, was drenna ischt:
Du hoscht schtatt Wagaschmiere mei Zwetschgag'sälz verwischt!"
